Қай кезде көрсеңіз де, қолынан кетпен-тырмасын, суқұйғышын тастамайды. Тіпті, сенбі-жексенбіде де өз қолымен еккен ағаштар мен гүлдердің жағдайын біліп кетеді. Еңбекқорлықтың жарқын үлгісі дерсің. Шаршамайды, талмайды. Күні бойы бір тынбайды. Есесіне, оның еңбегінің нәтижесі – көрген көз сүйсінерліктей.
Әңгіме Темірбек Жүргенов атындағы шығармашылық үйінің бағбаны Болат Кенжебекұлы хақында.
– Жерге қандай дән тастасаң да, оған су аздық етеді. Сол суға маңдайыңның тері қосылғанда ғана жақсы нәтижеге қол жеткізесің. Әуелі жерді дайындайсың, содан кейін тұқымның жақсысын таңдайсың. Жерге тастаған дәнің тамырлап, өсімдік шыққан кезде еңбектенудің келесі кезеңі басталады. Айналасындағы қажетсіз шөптерді жұлып, жердің нәрін сізге керекті өсімдіктің алуына жағдай жасайсың. Түбін шабасың, суарасың. Міне, өздеріңіз күнделікті көріп жүрген жасыл-желек осындай еңбекпен көктейді, – дейді Болат бағбан.
Бүгінде шығармашылық үйінің айналасы ну орманға айналғандай. Жаз ортасынан бастап қыркүйек, қазанда да гүл ашып, айналаға әсемдік сыйлайтын керемет гүлдер ғимаратқа көрік сыйлап тұр.
– Мына гүлдердің қай-қайсысына да күтім керек. Баладай мәпелемесең, еңбегіңнен еш уақытта нәтиже шықпайды. Алла тағала әр адамның бойына қабілет пен дарын береді. Бәлкім, маған берілген дарын осы Табиғат-Ананың тілін ұғыну шығар, – дейді Болат Кенжебекұлы.
Даңғыл жолдың бойындағы мекеме қызметкерлері көркейту-көгалдандыру мен айналаны жасыл-желекке бөлеуде алдыңғы қатарда тұр. Ерте көктемнен бастап «Таза Қазақстан» жалпыұлттық экологиялық акцияға белсене атсалысып, ауланы мұнтаздай етуде. Тазалық турасына келгенде, сенбіліктің себі тиер сәт көп.
– Көпшілік жұмыстарды сенбілік кезінде бітіріп алып, ары қарайғы күтіп-баптау жұмысына Болат Кенжебекұлы мен Ғабит Өтепов атсалысады. Бүгінде еңбекқор кісілердің арқасында қоғам дамиды. Мемлекет басшысынан бастап қолдау көрсетіліп келеді. Жүрген жерін гүлдендіріп жүретін мамандарымызбен мақтанамыз, – дейді мекеме қызметкері Нұрлан Дауылбаев.
Даңғыл жолдың бойында көрікті келбетімен көз тартқан аула менмұндалайды. Иығына тырмасын іліп алған бағбандар маңдай терін төгіп жүр. Олар уақытқа қарамайды…
«Qyrdan» — ақпарат
