Биыл Сырдария ауданына қарасты Қоғалыкөл мен Шіркейлі ауылы көгілдір отынға қосылмақ. Бұл іске республикалық бюджеттен 720 млн теңге қаражат бөлінді.
– Жалпы құны 3,3 млрд теңгеге Шіркейлі, Қоғалыкөл және Бесарық ауылдарын газдандыруға бюджеттік өтінім ұсынылды. Ал Шіркейлі мен Қоғалыкөлге жұмысты бастап кетуге республикалық бюджеттен 720 млн теңге бөлінді. Жақын арада жұмыс басталады, – дейді Сырдария ауданының әкімі Берік Сәрменбаев.
Өткен жылы бұл ауданда газдандыруға 4 млрд теңге қаржы қаралған. 2025 жылы Нағи Ілиясов, Шаған ауылдары көгілдір отынға қосылды. Ал биылғы жоспардағы жұмыс орындалса, аудан халқының 80 пайызы табиғи отынмен қамтылмақ.
«QYRDAN-ақпарат»