Оны «Охотзоопром» РМК Қызылорда өңірлік филиалы қызметкерлері Арал аумағынан қар астынан тапқан. Бұл – киіктің аталықтарының өлекселері. Өткен жылы қызметкерлер 463 аң өлексесін залалсыздандырған еді.

«KAZINFORM»-ға берген сұқбатында филиал басшысы Расул Маханов киіктердің ел ішіне кіргені туралы айтты.

– Бүгінде елімізде үш популяцияда 3 млн 978 мың киік тіршілік етеді. Орал популяциясы — 2 млн 300 мың, Бетпақдала популяциясы — 1 млн 600 мың, Үстірт популяциясы — 78 мың. Киік саны он жыл шамасында 40,4%-ға көбейген. Бұл — былтырғы санақ қорытындысы, санақ киік төлдейтін сәуір, мамыр айларында жүргізілгенін ескеруге тиіспіз. Біздің есебімізше, Сыр өңірінде 60-65 мыңдай бас киік бар. Оның 30 мыңнан астамы Арал ауданының аумағында шоғырланған. Киік — тез көбейіп, тез азаятын аң. Қыс қатты, қар қалың болған 1992 жылы киіктер көптеп қырылған көрінеді. Саны тіпті 15 мыңға дейін түсіп кеткен деген дерек бар. Жиырма жылдан астам уақыт көбею тенденциясы байқалды. 2013 жылы еліміздің солтүстік бөлігінде қайтадан аурудан қырылып қалды. Кейін тағы көбейе бастады. Миграция жолымен кезінде киік Қызылорда облысы арқылы Өзбекстанға өтіп кеткен жағдайлар болған, – деді Р.Маханов.

«Qyrdan»—ақпарат