Қызылордада бейнебақылау камераларының көмегімен қоғамдық орынды ластау дерегі анықталды. Полициямен жедел түрде тиісті шаралар қабылданды. Құқық бұзушы анықталып, полиция бөліміне жеткізілді.

Темекі тұқылын тастап, қоғамдық орынды ластаған 27 жастағы қала тұрғыны Бексеитов Ильяс болып шықты. Бұл әрекеті үшін азаматқа қатысты әкімшілік шара көрілді. Сот шешімімен оған айыппұл салынды.

Құқық бұзушылықтың салдары жойылып, ластанған аумақ тазартылды.

Мұндай құқық бұзушылықтар үшін заңмен жауапкершілік көзделген. Сондықтан әрбір тұрғын қоғамдық орындарда тазалық сақтап, қоршаған ортаға ұқыпты қарауы тиіс.

Бүгінде бейнебақылау камералары арқылы тек темекі тұқылын тастағандар ғана емес, қаланың кез келген жеріндегі қоқыс контейнеріне рұқсатсыз қажетсіз затыңызды тастасаңыз да, ізіңізден дереу құқық қорғаушылар еріп келуі ғажап емес. Өйткені, үлкен шаһарды алақандағыдай көріп отырған орталықта «Қызылорда тазалығының» екі бірдей қырағы қызметкері отыр.

– Облыс әкімінің тапсырмасына сәйкес, орталықтандырылған камераға бізден екі қызметкер отыруы керегі тапсырылды. Халық көп шоғырланған қоғамдық жерлердегі қоқыс контейнеріне кейде басқа жақтан көлікпен әкеліп төгіп кететіндер бар. Міне, орталықтандырылған камерадан біздің екі қызметкер бақылап, қарап, көріп отыр бәрін. Камерадан бірден көлік нөмірін, адамын тауып аламыз. Бұл бастама бізге үлкен мүмкіндік берді, – дейді «Қызылорда тазалығы» мекемесінің басшысы Сапарғали Ғалиұлы.

«Заң мен тәртіп» қағидаты – қоғамдық тәртіпті сақтау, құқық бұзушылықтардың алдын алу және азаматтардың заң талаптарын орындауын қамтамасыз етудің маңызды негізі. Осы бағытта қоғамдық орындарда тазалық пен тәртіпті сақтау талаптарының орындалуына полициямен тұрақты бақылау жүргізілуде. Оның үстіне 1 шілдеден бастап, тұрғындар өзінің үйінің тұсының қажетсіз шөбін жұлып, қоқысын тазартып отыруы тиіс. Бұл бағытта да қазір мобильді топ құрылып, жұмыс істеп жатыр.

– Біз осы бағытта рейд ұйымдастырамыз. Жұмысшы топ құрылған. Олар осындай бейберекет қоқыс тастағандармен күреседі, ауласының тұсын таза ұстамағандармен күреседі. Тіпті кей кісілер құрылыс жұмыстарын жүргізіп жатып, құрылыс қалдықтарын жаяу жүргіншілер жолын былай қойғанда, көлік жүретін көшеге дейін төгіп тастайды. Кейде осы қоқыстан қашқан бір көлік екінші бір көлікке соқтығысып, жол-көлік оқиғасы орын алып жатады. Мұның барлығының алдын алу жолында құрылған мобильді топ жұмысын бастады. Есік алдына құрылыс қалдықтарын және басқа да қоқыстарды төгіп тастаған тұлғаларға әуелі ескерту беріледі. Содан кейін салынған айыппұл он күн ішінде төлесе 43 мың теңге, одан кейін 86 мың теңге болады, – дейді мекеме басшысы.

Қазіргі таңда заң аясында қатаң шаралар көрілген сайын, жұмыс та жүйеге түскен. Тәртіп тегеурінді болғанда, нәтиже де жемісті болмақ.

«Qyrdan»—ақпарат