«Су – тіршілік нәрі». Көктем келіп, күн күлімдей бастағаннан диқандар қауымы су көздерін ашып, арықтарын тазалай бастайды. Бүгінде Қызылорда облысындағы елді мекендерде мұндай жұмыстар үрдіске айналған. Елге аяқсу апаратын су көздері түрлі өсімдіктер мен көмілген топырақтан тазартылады. Аяқсу жіберілген сәтте өсімдіктер судың жолын бөгеуі мүмкін. Облыстың Сырдария ауданында бұл жұмыс қарқын алған. Жетікөл, Айдарлы ауылдарында каналдар механикалық тазалау жұмыстары жүруде.

Аталған елді мекендердегі «Жетікөл жарма» және «Ақтам» каналдарының арналары ашылып, көмілген топырағы алынуда. Мұндағы жұмыстың сапалы орындалуы аудан әкімі Берік Сәрменбаевтың қырағы назарында.

Аталған елді мекендерді аяқсумен тұрақты қамтамасыз ету мақсатында «Жетікөл жарма» каналының 16,5 шақырымдық бөлігінде кешенді тазалау және қалпына келтіру жұмыстары жүргізілуде. Сондай-ақ, «Ақтам» каналының сағасы тазартылуда. Бұл жұмыстарға «Қазсушар» ШЖҚ РМК Қызылорда филиалы арқылы 9 эксковатор, 4 ауыр техника, 1 бульдозер және 2 қосымша арнайы техника жұмылдырылған.

Бүгінде каналдардың 2,2 шақырымы тазартылды. Жұмысшы топ белгіленген жоспарға сәйкес канал арнасын кеңейту, түбін тереңдету жұмыстарын қарқынды түрде жүргізуде.

Аудан әкімі жауапты сала басшыларына және мердігер мекеме өкілдеріне жұмыстың сапасын арттыру, белгіленген мерзімнен кешіктірмей аяқтау жөнінде нақты тапсырмалар жүктеді.