Ақпанның ақ бораны соғып, табиғат өз мінезін айқын көрсетті. Нөсерлеген жауын салдарынан жолдарда көктайғақ пайда болды. Көктайғақ – адамдар мен көліктер үшін өте қауіпті табиғи құбылыс. Жолдар мен жаяу жүргінші жолдары тайғанақ болып, апат қаупі артты. Осы уақытта тәртіп сақшылары күшейтілген түрде қызмет атқарды.

Мәселен 26 ақпан күні күндізгі кезекшілік барысында Қызылорда облысының Жалағаш ауданы аумағында қоғамдық қауіпсіздікті қамтамасыз ету кезінде полиция қызметкерлері жедел әрекет етті. Олар Жалағаш кенті Қазыбек би көшесінің бойында ауа — райының қолайсыздығына байланысты электр сымдарына мұз қатып, олардың салбырап төмен түсуі салдарынан жол бойымен өтіп жатқан жүк көліктерінің қозғалысына кедергі болды.
Қалыптасқан жағдайға байланысты аудандық полиция бөлімінің қызметкерлері – полиция аға лейтенанты Жолдас Нұрлыбек пен полиция лейтенанты Жақсыбай Әсет жол қозғалысы қауіпсіздігін қамтамасыз ету мақсатында жедел шара қабылдады. Қызметтік автокөлікті пайдалана отырып, электр сымдарына жабысқан мұзды түсіріп, жол қозғалысына төнген қауіпті жойды.
Оқиға орнынан өтіп бара жатқан тұрғындар полиция қызметкерлерінің әрекетін бейнежазбаға түсіріп, әлеуметтік желілерде жариялаған. Алғыстарын айтқан тұрғындар да аз емес.
Полиция қызметкерлерінің жедел әрі кәсіби іс-әрекеттерінің нәтижесінде жол-көлік оқиғаларының алдын алу қамтамасыз етіліп, көлік қозғалысы қалпына келтірілді.
Айта кетерлігі ауа — райының күрт өзгеруіне байланысты ағымдағы жылдың ақпан айының 25-і күні «Қарабұтақ-Шымкент- Қызылорда» автожолының (Ақтөбе шекарасынан Түркістан шекарасына дейінгі аралықта) бойында барлық көлік құралдарының жүруіне уақытша шектеу қойылды. Бұл автожолдың бойында тәулік бойы тәртіп сақшылары қызмет етіп, бірқатар көлік құралдары жұмылдырылды. Автожолдың бойынан 14 жерден уақытша тұрақты бекеттер ашылып, жақын жерлерде орналасқан тұрақтарға, кемпингтерге және қонақ үйлерге көлік құралдары кіргізілді. Сонымен қатар полицейлер жүргізушілерге сақтық шараларын түсіндіріп, ескерту жұмыстарын қатар жүргізді.