«Бүгін аудан үшін айрықша маңызға ие тарихи күн болды. Мемлекет басшысы Қасым-Жомарт Тоқаев бастамасымен елімізде өткен Қазақстандағы Конституциялық референдум аясында аудан тұрғындары бір кісідей белсенділік танытып, өз таңдауларын жасап, ел болашағына қатысты маңызды шешім қабылдауға қатысты. Бұл – халықтың мемлекет тағдырына бейжай қарамай, ортақ болашақ үшін жауапкершілікпен қадам жасап отырғанының айқын көрінісі.
Жалпы алғанда, бұл референдум – Мемлекет басшысының соңғы жылдары жүйелі түрде жүзеге асырып келе жатқан саяси реформаларының нақты нәтижесі әрі жарқын көрінісі деп айтуға толық негіз бар. Аталған бастама еліміздің саяси жүйесін жаңғыртып, демократиялық қағидаттарды нығайтуға, азаматтық қоғамның рөлін арттыруға бағытталған маңызды тарихи қадам болып отыр», — деді Шиелі аудандық мәслихатының төрағасы М.Тұрабаев.

Референдум барысында аудан тұрғындары жоғары белсенділік танытып, азаматтық ұстанымдарын айқын көрсетуде.

Дауыс беру үдерісі ашықтық пен жариялылық қағидаттарына толық сай ұйымдастырылып, заң талаптарына сәйкес өтуде. Мұндай маңызды саяси науқанда халықтың белсенділігі мен ұйымшылдығы еліміздің тұрақтылығы мен жарқын болашағына деген сенімді одан әрі нығайта түсетіні сөзсіз.