Білім күнінде Сырдария ауданының әкімі Берік Сәрменбаев С.Сейфуллин ауылындағы №137 мектепке барып, салтанатты іс-шараға қатысты.
Аудан басшысы салтанатты іс-шарада ұстаздар, ата-аналар мен оқушыларды аймақ басшысының атынан Білім күнімен құттықтады.
– Сіздерді облыс әкімі Нұрлыбек Машбекұлы Нәлібаевтың атынан және Өзімнің атымнан бүгінгі Білім күнімен шын жүректен құттықтаймын! «Оқу – білім азығы, білім – ырыс қазығы» дейді дана халқымыз. Білім – баға жетпес байлық, ел дамуының алтын арқауы. Өсіп-өркендеудің, жетістікке жетудің негізі терең білімде жатыр. Мемлекет басшысы Қасым-Жомарт Кемелұлы Тоқаев білім мен ғылымның дамуына аса мән беріп, жастарды оқуға, жаңа ғылым-білімді игеруге үндеп келеді.
Президентіміздің тапсырмасымен, аймақ басшысы Нұрлыбек Машбекұлы Нәлібаевтың қолдауымен білім саласында айтулы жетістіктер бар. Мемлекет басшысының бастамасымен қолға алынған «Келешек мектептері» ұлттық жобасы аясында 54 млрд. 400 млн. теңгеге 6900 орындық 10 мектептің құрылысы жүргізіліп, пайдалануға берілуде. Бүгінде 9 мектеп ел игілігіне табысталса, 1 мектеп Ұстаздар күнінде пайдалануға беріледі.
Аймағымызда білім беру саласына соңғы үш жылда 812 млрд. 245 млн. теңге бөлінді. Биылғы жылы 346 млрд. 800 млн. теңге қаралды. Қаржыландырудың барлық көздерінен өткен жылы 31 млрд. 800 млн. теңгеге 13 білім беру ұйымдары жаңадан ашылды. «Білімді қолдау қоры» арқылы 8 млрд. 400 млн. теңгеге Қызылорда қаласында дарынды балаларға арналған физика-математика бағытындағы жатақханасы бар 400 орындық мектеп-интернаты ел игілігіне табысталды. Облыстық бюджеттен 11 млрд. теңге қаржыға балалар мен жасөспірімдерге арналған «Сыр жұлдыздары» шығармашылық-инновациялық академиясы салынып, мамыр айында пайдалануға берілді. Өткен жылы «ҚазМұнайГаз» Ұлттық компаниясының демеушілігімен Қызылорда қаласында 2 млрд. 500 млн теңгеге заманауи үлгідегі 350 орындық Оқушылар сарайы ашылды. Соңғы үш жылда 5 млрд. 300 млн. теңгеге
15 мектептің ғимараттарына күрделі жөндеу жүргізілді.
Биыл облыстық бюджеттен 2 млрд. 400 млн. теңге бөлініп, 9 мектеп қайта жаңғыртудан өтті. Президентіміздің тапсырмасына сәйкес алдағы үш жылда өңіріміздегі 51 мектеп күрделі жөндеуден өтеді. Қайтарылған активтер есебінен 8 млрд.
200 млн. теңгеге 5 мектептің құрылысы қаржыландырылатын болады. Балалардың қосымша білім беру жүйесін дамыту мақсатында үш жылда 4 оқушылар үйі мен 2 өнер мектебі салынып, зияткер жас ұрпақты қалыптастыруға қызмет етуде.
Қазіргі таңда қайта жаңғыртудан өтіп жатқан Президент саябағында 10 млрд. теңгеге жылдың 4 мезгілінде үздіксіз жұмыс жасайтын 300 орындық заманауи балалар тынығу лагері салынуда. Бұл бағыттағы жұмыстар ауданымызда да жүйелі жүзеге асырылуда. Білім саласындағы жарқын жетістіктер аудан ұстаздарының еңбегінің нәтижесі деп білемін. Сондықтан мектептің жүрегі саналатын ұстаздар қауымына, оларға үнемі қолдау білдіретін сала ардагерлеріне шынайы алғысымды білдіремін, – деді Берік Әбдіғаппарұлы.
Жаңа оқу жылы жаңа қарқынмен басталуда. Биылғы жаңа оқу жылында ауданда 8208 оқушы білім алатын болса, оның ішінде 766 бала мектеп табалдырығын аттады. Оқушылардың сапалы білім алуына барлық жағдай жасалған. Биыл 243 млн. теңгеге аудандағы 7 мектепке ағымдағы жөндеу жұмыстары жүргізілді.
С.Сейфуллин ауылындағы №137 орта мектеп 309 млн. теңгеге күрделі жөндеуден өткізілді.
Іс-шара барысында мектеп директоры А.Мамытов білім ошағы жетістіктерін атап өтсе, ардагер ұстаз Қ.Молдаш жаңа оқу жылына сәттілік тіледі.
Мерекелік көңіл-күй оқушылардың жүрекжарды тілектерімен және әсем ән-шашуымен жалғасын тапты. Әсіресе алғаш мектеп табалдырығын аттаған кішкентай бүлдіршіндердің қуанышы баршаға ерекше әсер сыйлады.