Жалпыұлттық экологиялық акция аясында қармақшылықтардың да қарқынды жұмысы көзге ұрып тұр. Апта сайынғы сенбілікпен қоса абаттандыру, көркейту, жасыл-желекке айналдыру да күн тәртібінен түскен жоқ. Таяуда аудан әкімі бұл бағытта халыққа үндеу жасады.

– Көктем – тазалық пен абаттандыру уақыты. Осы ретте, тұрғындардың тазалық жұмыстарына атсалысуы аса маңызды деп есептеймін.

«Ауылына қарап, азаматын таны» дегендей, әр елді мекеннің тазалығы, сәулетті көркі тұрғындардың жанашырлығына байланысты. Себебі әр көшенің, әр үйдің, әр ауланың тазалығы – тұтас аудан мен ауылдың айнасы.

Тазалық пен тәртіп – кез — келген аймақтың табысты дамуының кепілі ғана емес, тұрғындардың мәдениеттілігінің өлшемі, – деді Жандос Еркінбек.

Ауданда өткен сенбілік барысында орталық көшелер мен қоғамдық орындар, саябақтар мен арықтар тазаланып, ретсіз өскен арам шөптер жойылды. Жиналған қоқыс қалдықтары арнайы техникалардың көмегімен шығарылды.