Қаланың шыға берісінде орналасқан Талсуат елді мекені даңғыл жолдың бойында орналасқан. Көршілес аудандардан ат терлетіп, облыс орталығына жол тартатын әрбір жан осы ауылдың үстімен өтеді. Әрдайым назардағы елді мекенде оған қоса, облыстық маңызды әлеуметтік нысан орналасқан. Талсуаттың тап-тұйнақтай болуында осындай маңызды себептердің әрбірі сеп болар…

Сырт көзге біліне бермейді, бірақ екі жарым мыңнан астам халқы бар Талсуатта ұзын саны 29 көше бар. Бүгінде «Таза Қазақстан» республикалық экологиялық акциясы аясында Талсуат ауылдық округінің аумағында санитарлық тазалықты қамтамасыз ету, абаттандыру, көгалдандыру және қоршаған ортаны қорғау бағытында жүйелі жұмыстар жүргізілуде.

– Ауыл тұрғындарынан тұрмыстық қатты қалдықтарды уақытылы жинау және шығару мақсатында ЖК Ибраевпен келісімшарт жасалып, бекітілген кестеге сәйкес аптасына бір мәрте ауыл аумағын аралап, жиналған тұрмыстық қалдықтарды шығару жұмыстары ұйымдастырылған. Жиналған қоқыстар Белкөл кентінің орталығында орналасқан қоқыс полигонына тасымалданып, белгіленген тәртіппен төгіледі. Ауыл үлкен жолдың бойында орналасқан. Сондықтан жауапкершілік жүгі жеңіл емес. Жол бойын да тап-таза ұстаймыз. Мұның әрбірі туған елге деген сүйіспеншіліктен туындайтын ой, – дейді ауыл әкімі Ерлан Бейсенбаев.

Ауыл аумағында тұрғындардың тұрмыстық қалдықтарын жинауға арналған төрт қоқыс контейнері орналастырылған. Жыл басынан бері ауыл аумағынан жалпы 32 тонна тұрмыстық қатты қалдық шығарылды. Оның барлығы арнайы орындарға жеткізіледі.

– Санитарлық тазалық жұмыстарын қамтамасыз ету мақсатында тоғыз қоғамдық жұмысшы тартылып, олар ауыл көшелерін, қоғамдық орындарды және елді мекен аумағын тазалау, қоқыстарды жинау, абаттандыру жұмыстарына тұрақты түрде қатысуда. Сонымен қатар, ауыл аумағын таза әрі көрікті ұстау мақсатында әр сенбі сайын тұрақты түрде сенбіліктер ұйымдастырылып келеді. Сенбілік жұмыстарына ауылдық округ аппаратының қызметкерлері, ауылдағы мекеме қызметкерлері және басқа да ұйым өкілдері қатысып, орта есеппен 30-35 адам ауыл аумағын тазалау, қоқыстарды жинау және абаттандыру жұмыстарына жұмылдырылады, – дейді ауыл әкімі.

Әлбетте, сенбілік, тазалық іс-шаралары маусымдық емес, жыл бойы тұрақты жүргізіліп келеді. Қызылорда қаласына қарасты әрбір ауыл, елді мекендерде бұл іс жолға қойылған. Талсуатта көгалдандыру бағытында да бірқатар жұмыстар атқарылуда. Атап айтқанда, көктемгі абаттандыру жұмыстары барысында ауыл аумағына үш жүз түп ағаш көшеті отырғызылды. Отырғызылған көшеттерді күтіп-баптау, суару және олардың жерсінуін қамтамасыз ету жұмыстары ұйымдастырылуда.

Ауыл көшелерінің санитарлық және эстетикалық жағдайын жақсарту мақсатында көшелердегі электр бағаналары мен бордюрлер жылына екі мәрте әктеліп, сырлау жұмыстары жүргізіледі. Бұл жұмыстар ауыл аумағының тазалығы мен көріктілігін қамтамасыз етуге бағытталған.

– Тұрғындар арасында абаттандыру қағидаларын сақтау, санитарлық тазалықты қамтамасыз ету және қоршаған ортаны ластауға жол бермеу бағытында түсіндіру жұмыстары тұрақты жүргізілуде. ҚР Әкімшілік құқық бұзушылық туралы кодексінің 505-бабы талаптарының сақталуына бақылау жүргізіліп, жыл басынан бері 14 азаматқа ескерту берілді. Сонымен қатар, абаттандыру қағидаларын бұзғаны үшін 4 азаматқа қатысты әкімшілік құқық бұзушылық туралы хаттама толтырылды. Қазақтың хас батыры Бауыржан Момышұлы «Тәртіпке бас иген құл болмайды, тәртіпсіз ел болмайды» деген емес пе?! Ел ішінде тәртіпке қатты қарап, барлығының өз орнымен болғанын қалаймыз, – дейді Ерлан Тұтқабайұлы.

Талсуат ауылдық округінде «Таза Қазақстан» акциясы аясындағы жұмыстар тұрақты түрде жалғасып, ауыл аумағының санитарлық тазалығын сақтау, тұрмыстық қалдықтарды уақытылы шығару, көгалдандыру және абаттандыру бағытындағы іс-шаралар жүйелі түрде жүзеге асырылуда.

Алдағы уақытта да ауыл тұрғындарының экологиялық мәдениетін арттыру, тазалық пен тәртіпті сақтау, абаттандыру жұмыстарын күшейту және елді мекен аумағын таза әрі көрікті ұстау бағытындағы жұмыстар жалғасын табады.