Қосшыңырау – қала іргесіндегі қос ауылды қанатының астына алған округ. Орталығы – Абай ауылы. Заманауи кейіпке еніп, шаруасы шалқыған елді мекенге апарар жолдың өзі жөндеу көріп, тақтайдай тегіс асфальттің үстінде көліктер сырғып жүр. Астанаға, бас қалаға бара жатсаңыз, Қосшыңырауға сәлем бере кетесіз. Әйгілі Жезқазған жолы деген осылай басталады. Міне, осындай маңызы болған соң ба, Қосшыңыраудан қоқыс көрмейсіз. Тазалық ұғымын тап-тұйнақтай етіп, жанына серік еткен. Жыл басынан бері 45 тонна қоқыс шығарылып, ауылды абаттандыру мен тазалық жұмыстары бірінші орынға шыққан.
– Жыл басынан бері Қосшыңырау ауылдық округінде «Таза Қазақстан» экологиялық бастамасы аясында бірқатар сенбілік және санитарлық тазалық жұмыстары ұйымдастырылды. Іс-шаралар барысында Абай және Досан ауылдарының көшелері, қоғамдық орындары, ауыл маңындағы аумақтар, Абай және Досан елді мекендерінің жанында орналасқан «Сүлеймен Ишан» қорымы, «Дарбас» қорымдары тазартылып, абаттандыру және көгалдандыру жұмыстары жүргізілді. Сенбіліктерге ауылдық округ аппаратының қызметкерлері, мекеме ұжымдары, жастар мен ауыл тұрғындары белсенді қатысты. Сенбіліктің арасы үзілген жоқ. Әлі де аталған акция аясында көп жұмыс атқарылып келеді, – дейді ауыл әкімі Сейдуали Әбдіқадыров.
Жыл басынан бері Қосшыңырау ауылдық округінде «Таза Қазақстан» жобасы аясында барлығы 26 сенбілік ұйымдастырылып, оған 311 адам қатысты. Сенбіліктер барысында 45 тонна қоқыс шығарылып, 971 га аумақ тазартылды. Ауылдық округте мекемелер және орталық Абай саябағына ағаштар отырғызылды.
– Ағаш егу бар да, оны көктету бар, күтіп-баптау бар. Біз әрбір жұмыстың нәтижелі болғанын қалаймыз. Міне, осы мақсатта ағаштарды қарап, саялы бәйтерекке айналуына дейін маңдай терімізді төгіп келеміз. Алдағы уақытта да тазалық жұмыстары тоқтамайды, – дейді ауыл әкімі.
Бүгінде Қосшыңырауға апарар жолда түнгі шамдар жарқырай түсіп, әсем келбетке ие етеді. Жол бойының да тазалығы ә дегеннен көзге түседі. Міне, мұндай жұмыста саусақ бірікпей ине ілікпейтінін біліп, бірлік бар жерде берекені қалап жүрген тұрғындардың еңбегі ерен екені даусыз.
