Бүгінде халықты қолдауға арналған түрлі мемлекеттік бағдарлама бар. Олардың барлығының мақсаты біреу: ол – халықтың қолын аузына жеткізу. Сырдария ауданына қарасты Қоғалыкөл ауылында жыл басынан бері 14 тұрғын қайтарымсыз грант иегері атанды. Солардың бірі – Ерболат Ибадуллаев.

Ерболат Алмасұлы қайтарымсыз қаржыға үш бас бұзаулы сиыр сатып алған. Ауылда тұрған соң төрт түлікті табысқа айналдыру – кәсіп көзі. Ет, сүт өнімдері сұранысқа ие. Күнделікті өмірден осыны түйген ол жоба дайындап, осы мүмкіндікке қол жеткізді.

– Қазір табиғи өнім сұраныста ғой. Кешегі пандемия кезінде ел-жұрт ағарған іздеп кетті. Қанша ауруға ем. Әрине, тек саумал ғана емес, төрт түліктің қай-қайсысын зерттесеңіз де, пайдасы шаш етектен болады. Осылай жобаны отбасымызбен ақылдаса келе қолға алдық. Көпшілік үш бас бұзаулы сиырмен не кәсіп ашты деп күлуі мүмкін. Құдай берекесін берсе, бір бас малдан да несібе бұйырады, – дейді ол.

Ауыл баласының бойында қазақы болмыс болады. Төрт түліктің қай-қайсысының да жағдайын жасап, бабын таба біледі. Ерболат – осы қатарда. Ол да кішкентайынан атқа қонып, мал бағып көрген жан. Зеңгібаба тұқымын көбейтіп, мал шаруашылығынан нәпақасын айыруды қалайды.

– Жұмыспен қамту орталығы арқылы «Стартап» жаңа бизнес идеяларды іске асыру мақсатында 14 адам 1 млн 572 мың 800 теңге көлемінде мемлекеттік қайтарымсыз грант алды. Мұнан бөлек, мемлекеттік және өңірлік бағдарламалар аясында «Сырдария – 1» несие серіктестігінен жеке кәсіпкер Бахтияр Сайлау 4 млн 600 мың теңге, Ғафиз Жақыпбекұлы мал басын көбейту (жылқы) мақсатында 11 млн теңге несие алды. «Майарық» шаруа қожалығы «Кең дала» бағдарламасы аясында егін шаруашылығын жүргізу мақсатында 120 млн несиеге қол жеткізді. Ал «Ауыл аманаты» бағдарламасымен СПК «Жирентай» балық өсіру бағытында 20 млн теңге несие рәсімдеді. Сонымен қатар, аграрлық несие корпорациясынан «Іскер» бағдарламасы аясында кәсіпкер Темірбек Қожанов мал басын көбейту (жылқы) мақсатында 4 млн 800 мың теңге несие алды. Олардың әрбірі кәсіпке бейімделіп, өздерінің айқын мақсатын дәлелдегендер. Алдағы уақытта да кәсіп ашу, оны дамыту бағытында ынталы жандарға бағытталған мұндай жұмыстар жалғасын табады, – дейді Қоғалыкөл ауылдық округі әкімдігінің қызметкері Алмат Омаров.

Бүгін 2 жарым мың халқы бар елді мекенде кәсіпке білек сыбана кіріскендер көп. Биылдың өзінде жаңадан 15 кәсіпкерлік субьектісі тіркелген. Ауылдағы барлығы 174 кәсіпкерлік нысанының 97 пайызы тұрақты жұмыс істеп тұр.

Дәулет ҚЫРДАН,
Сырдария ауданы