Қызылорда қаласына қарасты қос кенттің бірі – Белкөл жаңару үстінде. Заманауи кейіпке енген кенттің төрінде тазалық жұмыстары да үздіксіз жүруде. Ал жаңарған кенттің осы кейпін сақтап, қисығын түзеп, тазалығын сақтауда «Таза Қазақстан» республикалық экологиялық акциясының маңызы зор.
– Бес мың гектардан асатын аумақта орналасқан Белкөл кентіне Бірқазан, Көкжиде елді мекендері де кіреді. Бүгінде бес мыңнан астам халық тұратын үлкен елді мекенге айналған. Қазір бізге мемлекеттің жасап берген жөндеуі мен барлық мүмкіндігін тиімді пайдаланып күтіп ұстау бағытында да қырауар іс атқарылуда. Көктемгі еккен ағашты тек егумен шектелмей, әрі қарай бой алып, өсуіне жағдай жасау керек тәрізді жұмыстар уақыт создырмай атқарылып келеді, – дейді кент әкімі Жасұлан Сәду.
Кенттегі көпқабатты үйлер мен жеке сектордағы үйлер ШЖҚ «Қызылорда тазалығы» КМК-мен келісім шартқа отырған. Жеке секторларды аптасына екі мәрте аралап, қоқысын алып отырса, мұндай жұмыс көпқабатты үйлердің ауласында күнделікті жүргізіліп отырады.
– Кенттегі 4 көпқабатты үйдің ауласы 16 дана қоқыс контейнерімен қамтылған. «Таза Қазақстан» республикалық экологиялық акциясы аясында кентте санитарлық-тазалық, көркейту-көгалдандыру жұмыстары, көшелерді тұрмыстық қатты қалдықтардан тазарту, ағаштар мен бардюрлер әктеліп, электр бағаналарын сырлау жұмыстары тұрақты жүргізілуде, – дейді Жасұлан Хабидуллаұлы.
Кент аумағында 23 көше бар. Қазіргі таңда барлығының шөптері шабылып, қоқыстан тазартылды. Жыл басынан бері кенттегі тазалық жұмыстарының нәтижесінде 40 тонна қоқыс шығарылған. Тазалық жұмыстарына 19 қоғамдық жұмысшы тартылды.
– Әр сенбі сайын аппарат қызметкерлерімен 50 шақты ерікті тұрғындар сенбіліктерге шығып тұрады. «Байқадам» каналының жағалауы қоқыстан үнемі тазартылып отырады. Көктемде кент аумағында 500 түп ағаш егілді. «Самара-Шымкент» автожолының бойындағы «Байқадам» каналындағы орналасқан көпір үнемі тазартылып, сырлау жұмыстары жүргізіледі. Көшелердегі электр бағаналары мен бордюрлер жылына 2 рет әктеліп, сырланады. Кентте орналасқан мекемелердің сырт келбеті мен аулалары қоқыстан тазартылып, әктеліп, сырланады. Мұның барлығы тоқтаусыз жүреді, – дейді кент әкімі.
Тазалықтың тап-тұйнақтай болуы үшін әрине, темірдей тәртіп керек. Бұл ретте талапшыл басшы заң аясында да жұмыс жүріп жатқанын айтты. Қазіргі таңда ҚР ӘҚБК 505 бабымен 56 азаматқа ескерту толтырылып, 6 азаматқа абаттандыру қағидаларын бұзғаны үшін хаттама толтырылды.
Бүгінде Қызылорда облысы бойынша заңсыз қоқыс үйінділері әрбір елді мекен халқымен бірлесе отырып тазартылып жатыр. Ауылдардағы сенбіліктер де талай іске сеп болып келеді. Экология департаментінің мамандары елді мекендерден тыс жерлерді қоса алғанда, аумақтарды үнемі тексеріп отырады. Анықталған оқиғалар негізінде жергілікті билік органдарымен бірлесіп аумақтарды тазарту және қоқыс төгетін орындардың қайта пайда болуына жол бермеу шаралары қабылдануда. Бұл ретте ауыл әкімдіктерінің де белсенді жұмысын жоққа шығаруға болмас.
Айта кетейік, 2018 жылдан бері «Қазақстан Ғарыш Сапары» ҰК» АҚ-мен бірлесіп жүргізіліп келе жатқан ғарыштық мониторинг бұл жұмыста маңызды құрал болып қала береді. Биыл оның көмегімен аймақта 53 заңсыз үйінділері анықталды. Бүгінгі күнге дейін олардың барлығы толығымен жойылды. Ғарыштық мониторинг деректері мен жер үсті тексерулерін біріктіретін кешенді тәсіл проблемалы аймақтарды уақтылы анықтауға және оларды шешу шараларын жүзеге асыруға мүмкіндік береді. Аумақтардың санитарлық жағдайын бақылау және жаңа заңсыз үйінділерінің пайда болуына жол бермеу жұмыстары жалғасады. Ал Қызылорда қаласына қарасты ауылдарда бұл жұмыс жолға қойылып, елді мекендерді тазарту жұмыстары күн тәртібінен түскен емес.
Қала іргесінен орын тепкен Белкөлдегі мамыражай тіршілік күнделікті дағдыдағыдай емес. Жұмыс қарқыны артып, жаңарған кенттің жайнаған кейпін сақтау бағытында азаматтар маңдай терін төгіп жүр.
