Қараөзектік Алып Маймақов төрт түлікті түлетіп, еңбегі мен нәпақасын адалынан тауып келеді. Мал шаруашылығын дамыту мақсатында бірнеше жыл бұрын төмен пайызбен несие алған ол бүгінде мемлекеттік қолдаудың жемісін көріп отыр.
– Мал шаруашылығын кәсіби түрде жүргізуді бала кезден армандадым. «Бексұлтан» жеке шаруашылығын 2002 жылы бастадық. Содан бері бұл іс менің өмірлік кәсібіме айналды. 2022 жылы мемлекеттен 6 пайызбен жеңілдетілген несие алып, жылқы малын көбейтуге мүмкіндік алдым. Қазір шаруашылықта 80-ге жуық түйе, 100-ге жуық ірі қара, 110 бас жылқы бар. Қолда бар малдың бәрі – күнделікті тіршілігіміздің тіні. Малдың жайын білсең табыс та, тыныштық та болады. Ауылда отырып, адал еңбектің арқасында да өсіп-өркендеуге болатынына көзім жетті. Осы күнгі жастар үшін мемлекет тарапынан көрсетіліп жатқан қолдау – үлкен мүмкіндік. Мал шаруашылығы – бейнетті, бірақ берекелі іс, – дейді Алып Сейтжанұлы.
Қызылөзекте 2025 жылдың алғашқы бес айындағы есеп бойынша 197 кәсіпкерлік субъектісі жұмыс істеп тұр. Бүгінде мұнда барлығы 30 шаруа қожалығы, 4 ауыл шаруашылығы кооперативі және 162 жеке кәсіпкер кәсібін дөңгелетуде. Бұл қатарда Ғамзат Ахметов те бар. Ол атасы, қой шаруашылығының үздігі, Социалистік Еңбек Ері Ахмет Халықовтың ізін жалғап келеді. Ата жолын жалғап, «Ахмет» шаруа қожалығы арқылы кәсібін өркендетуде.
– Атадан-балаға мирас боп қалған осы кәсіпті қолға алдым. Әрине, үлкендердің жолын жалғау – біз үшін бақыт. Олардың салған сүрлеуінде жаман болып жүргеніміз жоқ. Отбасымыздың ырзық-несібесін адалынан, маңдай термен тауып келеміз. Атакәсіп аш қалдырмайды, – дейді кейіпкеріміз.
Айта кетейік, ертеректе Қараөзек болыстығының №2 ауылы болған бұл мекенде ел еңсесін көтерген колхоздар құрылып, мыңдаған халық егін егіп, мал бағып, тіршілік тізгінін ұстады. Жер-Ананы түлеткен қарапайым еңбек адамдары бұл даланың нағыз иесі екенін дәлелдеді. 1956 жылы ет бағытындағы совхоз болып құрылған Қараөзек кеңшары 1962 жылы қаракөл қойын өсіруге мамандандырылған ірі шаруашылыққа айналды. Сол жылдары кеңшарда 45 мың қой, мыңнан аса жылқы мен түйе өсіріліп, мемлекетке мол өнім тапсырылып отырды. Жыл сайын 3 мың центнерге дейін ет, көлемі мол тері мен жүн ел қазынасын толықтырды.
– Еңбегімен аты шыққан елді мекеннің бүгінгі тұрғындары да осал емес. Қазір ауыл негізгі күнкөрісін де еңбектен көріп отыр. Елде егін, мал шаруашылығымен көктеп, көгеріп отырғандар көп. Олар кез келген уақытта мемлекеттік бағдарламалар арқылы кәсібін дамыта алады. Бұл мүмкіндіктерді пайдаланып отырғандар да жетерлік. Ауыл шаруашылығы саласында қыруар нәтиже бар. Өзі ғана емес, өзгені де жұмыспен қамтуға тырысып, елге болсын дейтін осындай кәсіпкерлер барда, халықтың да жағдайы жақсара түсетініне сенемін, – дейді ауыл әкімі Сәкен Әбдіжаппар.