11-14 тамыз күндері Жаңақорған кенті, Қорасан Ата көшесіндегі дене шынықтыру сауықтыру спорт кешенінде жаттықтырушы, білікті бапкер Мұрат Тотаев пен КСРО спорт шебері Сапархан Шайменовтерді еске алуға арналған еркін күрестен 2008-2009 ж.т. жасөспірімдер арасындағы республикалық турнир және жасөспірімдер арасындағы Азия ойындарына іріктеу турнирі өткізілді.

Турнирдің ашылу салтанатына аудан әкімінің орынбасары Бектас Нуридинов, Қызылорда облысының Ауыл партиясының төрағасы, облыстық маслихат депутаты, Қазақстан Республикасының еңбек сіңірген жаттықтырушысы, «Құрмет» және «Парасат» ордендерінің иегері Садық Мұстафа, Жаңақорған ауданының құрметті азаматы, Қазақстан Республикасының еңбек сіңірген жаттықтырушысы Абутәліп Аманов, Қызылорда облысының футбол федерациясының атқарушы директоры Жақсылық Оспанов, Жаңақорған ауданының құрметті азаматы, ҚР-ның дене шынықтыру саласының құрметті қызметкері Мадияр Ахметов, ҚР-ның еңбек сіңірген жаттықтырушысы Жангелді Жұмабаев, сондай-ақ, 2 дүркін Әлем чемпионатының жүлдегері, 3 дүркін Азия чемпионы, жасөспірімдер арасында еркін күрес бөлімінің Қазақстан құрамасының жаттықтырушысы, еңбегі сіңген спортшы Даулет Ниязбеков қатысып, байрақты бәсекелерде көк туымызды көкте желбірете беріңіздер! — деген ниетпен спортшыларға сәттілік тіледі.

Турнирге еліміздің 17 облысы 3 қаласынан 300-ге жуық спортшы қатысты.

Сондай-ақ, Жаңақорған ауданының №7 спорт мектебінің құрылғанына 55 жыл толу мерекесіне орай құрметті қонақтар мен спорт ардагерлері естелік медальдарымен марапатталды.