Жылғалардан су ағып, күн көзі күлімдегеннен бастап-ақ, сырдариялықтар алқапқа көз тіккен. Су мәселесі мінберге шыққан сайын шаруалар күріш көлеміне байланысты түйткілді ақылмен шешті. Биыл ауданда егілетін Сыр салысының көлемі 3 мың гектарға жуық азайды. Нәтижесінде оның орнына суды аз қажет етілетін дақылдар орналастырылмақ.
Жыл сайын «Алтын күзде» жарқын жүзі нұрланып, тұғырға шығатын бұл ауданда биыл 32 064 гектар жерге егін егілмек. Негізінен бағыты егін шаруашылығына жақын ел күріш көлемін 17 мың гектар деп белгілепті. Өткен жылы бұл дақылды 19 950 гектарға орналастырған болатын.
– Бұл көлемді тарқатып айтар болсақ, жаздық бидай – 1885 гектар, дәндік жүгері – 2000 гектар, мақсары 384 гектарға егілсе, сояны 105 гектарға, жаңа жоңышқаны 2200 гектарға, картопты 142 гектарға, көкөністі 180 гектарға, бақша дақылдарын 368 гектарға жеткіздік. Ал ескі жоңышқаның көлемі – 7800 гектар. Бүгінгі күні ауыл шаруашылығы құрылымдарында жалпы көлемі 3570 гектар жерге ақ егіс егілді, – дейді аудандық ауыл шаруашылығы және жер қатынастары бөлімінің басшысы Бағлан Мейрамбекұлы.
Биылғы егілген дақылдардың қатарында 1 538 гектар жаздық бидай, 355 гектар мақсары, 1 677 гектар жаңа жоңышқа бар. Ауданда малазықтық дақылдар да зор сұранысқа ие. Сырдария ауданының халқы егін шаруашылығынан бөлек мал шаруашылығымен де айналысады. Оның үстіне ауданның облыс орталығына жақын орналасуы да өнімді өткізе алуына мүмкіндікті кеңейтеді.
– Биылғы егіске 5 000 тонна күріш тұқымы құйылып, қазіргі таңда 2 569 тоннасы (51,4 пайыз) себу дәрежесіне жеткізілді. Күріш егісіне қажетті минералдық тыңайтқыштың көлемі 10 800 тоннаны құраса, бүгінге 8 460 тоннасы (78,3 пайыз) сатып алынды. Олардың қатарында аммоний сульфаты (4870 тонна), карбамид (2340 тонна), аммофос (1250 тонна) бар. Ауыл шаруашылық құрылымдарындағы техникалар да жеткілікті. Бүгінде 800-ге жуық техника егіс даласында жұмыс істеп жатыр, – дейді Бағлан Мейрамбекұлы.
Үкімет тарапынан көктемгі дала жұмыстарына қажетті 2825 тонна дизель отынының 1015 тоннасы (36,0 пайыз) оператор «Жібек жолы ЛТД», «РК Мұнай» компаниялары арқылы әр литрі 281 теңгеден (нарықтағы баға 325 теңге) шаруашылық құрылымдарына жеткізілуде.
Бүгінде аудан бойынша «Қазсушар» РМК облыстық филиалымен 117 шаруа қожалығы аяқсуға келісімшартқа отырды. Мұнан бөлек, ауданда барлығы 91 дана насос қондырғылары бар. Оның ішінде 33 дана насосты ауылдық округтердегі үй іргесіндегі жерлерге және шаруашылықтар егінге 58 дана насосты пайдаланатын болады.
– Қашыртқылар, каналдарды тазалау, гидротехникалық құрылыстарды жөндеу жұмыстары бойынша ішкі су жолдарының 200 000 текшеметр (95 %) топырақ шығарылып, 13 дана (100,0%) гидротехникалық құрылыс, 48 дана (100,0%) су тартатын қондырғылары жөнделді. 2026 жылы аудан бойынша 2000 гектарға жүгері дақылын егу жоспарлануда. Бүгінгі таңда шарушылықтар нақты 725 гектарға жүгері дақылын егуге дайындығын бастады. («Шаған жер» ЖШС 505 га, «Ақжарма и К» ФҚ 200 га, «Тұмар» ЖК 20 га). Қостанай облысындағы «Манай агро» ЖШС тұқым шаруашылығы мекемесінен жүгері тұқымын сатып алуға келісім-шартқа отырды. Тұқым сәуір айының 20-на дейін жеткізілетін болады. Жүгерінің пионер, лимагрейн сорттары егілмек, – дейді Б.Мейрамбекұлы.
Бүгінде дала жұмыстары қызу жүруде. Асыраушы саланың мамандары көктемде еңбек қандай болса, күздегі зейнет пен несібенің де сондай боларына сенімді.